اُس دل پہ لاکھ بار ہو رحمت حضور کی
سرکار کا جمال خدا کا جمال ہے
آئینہ ء جمال ہے صورت حضور کی
صبحِ ازل کو جس نے پر انوار کر دیا
جلوہ حضور کا تھا وہ طلعت حضور کی
صدیق ہمرکاب تھے بستر پہ تھے علی
ہر طرح کیف بار تھی ہجرت حضور کی
رحمت ، رسولِ پاک ہیں کونین کے لئے
کونین کو محیط ہے رحمت حضور کی
اس ذاتِ بے مثال کو تشبیہ کس سے دوں
اک حُسنِ بے مثال ہے صورت حضور کی
لاکھوں درود آلِ رسولِ کریم پر
محشر میں بخشوائے گی عترت رسول کی
اے کاش میں بھی خواب میں دیکھوں حضور کو
اے کاش مجھ کو بھی ہو زیارت حضور کی
جب کوئی بھی نہ مونسِ جاں ہوگا حشر میں
ڈھونڈے گی عاصیوں کو شفاعت حضور کی
میرے لئے یہ کم شرف و افتخار ہے؟
بندہ خدا کا اور ہوں اُمت حضور کی
اے کار ساز! اپنے کرم سے مجھے نواز
اے کردگار! بخش محبت حضور کی
شیریں ہے میرے شاہ کا ہر ایک تذکرہ
رنگیں ہے ہر ایک حکایت حضور کی
جس میں خدا کی ذکر تھا جس میں خدا کی یاد
خلوت حضور کی تھی وہ جلوت حضور کی
ہے مظہرِ جمالِ خدا روضہ آپ کا
آئینہ دارِ حُسن ہے تربت حضور کی
اے ناشناسِ لذت سوز وگدازِ عشق
آ مجھ سے سن لذیذ حکایت حضور کی
امیدوارِ لطف و کرم پر بھی ہو کرم!
مشہور ہے جہاں میں سخاوت حضور کی
میری نوا کا سوز ، مرے زمزموں کا نور
بخشش حضور کی ہے ، عنایت حضور کی
اول تھا انبیا سے شہِ انبیا کا ذکر
آخر ہے مرسلیں سے رسالت حضور کی
شاہد ہے ان کے قول و عمل پر کلامِ حق
ثابت کلامِ حق سے ہے عصمت حضور کی
مظہر ہزار جان فدا ایسی موت پر
سنے ہیں مر کے ہوگی زیارت حضور کی
♥♥♥الصلواة والسلام عليک يارسول الله♥♥♥♥♥♥الصلواة والسلام عليک ياحبيب الله♥♥♥السلام علیکم و رحمۃ اللہ وبرکاتہ و مغفرته
No comments:
Post a Comment